Харанхуйн хүчнээс чөлөөлөгдсөн нь 6-р бүлэг

6-р бүлэг: Уруу татлага ба Ялалт

“Миний хонин сүрэг дууг минь сонсдог. Би тэднийг мэддэг бөгөөд тэд Намайг дагадаг юм. Би тэдэнд мөнх амийг өгнө. Тэд хэзээ ч мөхөхгүй бөгөөд тэднийг хэн ч Миний гараас булаахгүй” Иохан 10:27-28.

Есүст итгэсний дараа миний амьдралд тохиолдсон хамгийн эхний зүйл бол манай гэрт байсан Далайн Хатаны зураг болон түүний бэлгүүд, далайн лабораториас сэм хулгайлж авсан байсан телескоп, TV, подвольк, зурагнууд алга болсон байв. Порт Харкуртаас эргэж ирснийхээ дараа Эзэний надад хийж өгсөн зүйлийн талаар гэрчлэн ярихыг хүсч байсан боловч сүмд намайг зөвшөөрөхгүй байв. Миний нагацын эхнэр итгэгч учраас намайг пасторуудынхаа нэгэнтэй уулзуулсан боловч хамгийн түрүүнд намайг сүмийн гишүүний баримт буюу пасторын тодорхойлолтоо авчирсан уу гэж асуусан юм. Намайг харанхуйн хүчнээс аврахдаа хайртай Хүүгээрээ дамжуулан өөрийн цусаараа миний гэмийг уучилж чөлөөлсөн Христийн хүч чадлыг гэрчлэн ярихад яагаад надад пасторын тодорхойлолт хэрэгтэй байсан юм бол? Сатаны үйл ажиллагаанд гүн оролцож байсан иймэрхүү залуу итгэгчдийг өөрсдийн гэрчлэлээ хуваалцан ярихаас Сатан бүх аргаараа зогсоохыг оролддогийг мэдэхэд надад гунигтай байсан. Эзэн надад, явж, Түүний надад хийж өгсөн зүйлийн талаар гэрчилж ярь гэсэн тодорхой зааврыг өгсөөр байтал яагаад ийм эсэргүүцэлтэй тулгарна вэ. Магадгүй цаг нь биш юм бол уу гэж би бодсон. Эцэст нь би хэнд ч юу ч ярихгүй байхаар шийдсэн. Би наймаа хийхээр шийдэж, Аба хотоос Того хот уруу 3 залуутай хамт явав. Би Аба хотод хэсэг наймаачдаас 90,000 найра зээлж, өөрөөсөө 70,000 найра нэмж, хэсэг даавуун материал, эм тариа, термометр гэх мэт аптекийн зүйлс худалдаж авсан юм. Биднийг Нигерийн хилээр гарахад гаалийн хүмүүс бидний барааг хураан авч хахууль шаардав. Бид төлөхөөс татгалзсан учраас бараагаа орхиж явахаас аргагүй болов. Хэдэн сарын дараа бидний барааг эргүүлж өгөхөд надаас бусад нь бараагаа хүлээн авцгаав. Дараа нь хэсэг хугацааны дараа эргэж очиход намайг 40,000 найра төлж байж бараагаа ав гэв. Бараагаа шалгаж байх хооронд үнэ цэнтэй даавуу, антибиотек эм, тарианууд алга болсныг мэдээд тэдгээр үлдсэн бараануудыг 40,000 найра төлж байж авах нь ямар ч ашиггүй учраас гааль дээр тэр чигээр нь үлдээхээр шийдэв.

Ингээд мөнгөө зээлүүлсэн наймаачид миний хойноос нэхэж эхлэв. Зарим нь шүүх цагдаа болж, зарим нь зүгээр л өөрсдийнхөө аргаар миний амийг хороохыг хүсч байв. Эцэст нь, надад байсан цорын ганц арга болох банкин дахь бүх мөнгөөрөө өрөө төлөв. Эзэний авралаар Лагос дахь байрны түрээс болох 1000 найрагаас бусад бүх өрөө төлж чадав. Би бүрэн дампууралд орж, автобусны мөнгө ч үгүй болов.

Би өөрийн мэдэх итгэгч хэд хэдэн бизнесменүүдтэй уулзсан боловч маргааш ир гэсэн олон удаагийн оролдлогын эцэст надад туслахгүйг нь ойлгов. Тэр үед би Бурханы Үгийг огт мэддэггүй, эргэлзээ төөрөгдлөөр дүүрэн Библиэ уншихыг оролддог байсан боловч огт ойлгодоггүй байв. Эдгээр бүх зүйл тохиолдож байх хооронд миний төрсөн тосгоноос яаралтай ир гэсэн мэдээ ирэв. Би гэртээ яаран очиход миний барьж эхэлж байсан байшинг нагац ах маань нураачихсан, намайг алахаар зэхэж буй түүний заналхийлэлтэй тулгарав. Миний доторх хуучин хүн маань сорилтод орсон. Намайг нууцлаг нийгэмлэгт байхад энэ нагац ах маань хэрхэн миний өмнө бөхөлзөж, өвдөг сөгдөн амь гуйдаг байсан нь санагдав. Гэтэл одоо тэр намайг өөрчлөгдсөнийг мэдээд (нагац маань миний өөрчлөгдсөнийг хаанаас яаж мэдсэн нь гайхалтай) намайг алахаар заналхийлж байв. Би Эзэнд уйлж, Та намайг аварсан мөртлөө яагаад миний итгэлийг хөсөр хаяна вэ, яагаад миний дайснууд надаар бах таваа хангана вэ! гэж уйлсан. Үүний дараа би нууцлаг нийгэмлэг уруу эргэж очихоор шийдсэн. Ядаж л би оюун санаандаа байгаа эргэлзээ самуурлаасаа сална, бас нагацдаа мартагдахааргүй сануулга өгнө дөө гэж бодож байв. Хэдийгээр би дотор зүрх сэтгэлдээ шийдсэн байсан боловч 2 зүйлийн талаарх айдас намайг эзэмдсээр байв.

1.        Эзэнтэй учрахад Тэр надад “Энэ бол чиний сүүлчийн боломж” гэж хэлсэн. Хэрэв би нууцлаг нийгэмлэг уруу буцаж очвол би бие махбодиороо төдийгүй сүнсээрээ Түүнээс тусгаарлагдана гэсэн үг.

2.        Хэрэв би Эзэнтэй хамт үлдвэл нагацын маань заналхийлэл надаас салахгүй.

Би дотроо маш их эргэлзээ самууралд орсон. Би Бурханы Үгийг ойшоодоггүй, дээр хэлсэн зүйлийн талаар Библид юу гэж хэлсэн байдгийг мэддэггүй нэгэн байв. Би залуу итгэгч байсан учраас миний амьдрал дахь сүнслэг зааварчлагаа дутагдсаны улмаас эдгээр бүх эргэлзээ төөрөгдөлд орсныг та мэдэж байгаа байх. Залуу итгэгч хүнд сүнслэг зааварчлагаа маш чухал, итгэгч хүн бүр үүнд гол анхаарлаа тавьдаг байх хэрэгтэй. Хэрэв та залуу итгэгчиддээ сүнслэг зааварчлагаа өгдөггүй бол гадаа гудамжинд Есүсийг гэрчлэх гэж оролдох хэрэггүй. Есүс Петрт хандан “Иоханы хүү Симон оо, чи Намайг тэднээс илүү хайрладаг уу? ... Миний хургануудыг тэжээ” гэж 3 удаа хэлсэн. Олон залуу итгэгч нар сүнслэг зөв зааварчлагаа дутагдсанаас болж итгэлээсээ буцдаг. Хэрэв та Есүст үнэхээр хайртай бол Түүний хургануудыг тэжээ!

Сатаны төлөөлөгчидтэй тэмцэлдсэн нь

Энэ үед Далайн Хатаны төлөөлөгчид миний араас нэхэж эхэлсэн. Тэдний гарт би ихэд зовсон. Хар дарж зүүдэлж эхэлсэн. Есүст итгэснээс хойш 1 сарын дараа 1985 оны 5сарын 1-нд шөнийн 2 цагийн орчимд бусад хүмүүс унтаж байхад тэдгээр Далайн Хатаны төлөөлөгчид намайг сэрээсэн. Тэд намайг байшингаас гарч явахыг хэлсэн. Би тэдний хэлсний дагуу гудамжинд гарахад тэд миний хойноос дагацгаасан. Хэдийгээр энэ бүгд зүүдэнд минь тохиолдож байсан ч би бодитойгоор бүгдийг хийж байсан. Бид тэгж явсаар Порт Харкурт хотын Аба замын дэргэдэх St. Paul's Anglican сүмийн оршуулгын газар ирсэн. Тэнд тэд надад “Чи бидэн дээр эргэж ирэх хэрэгтэй. Хэрэв ирэхгүй бол бид чамайг алах болно, чамайг золиос болгох болно“ гэв. Ийнхүү хэлээд тэд алга болсон. Би тэр даруйд сэрэхэд яаж тэр оршуулгын явж ирсэнээ санаагүй. Би гэртээ буцаж унтсан. Дараа нь тэд над уруу өдрийн цагт дайрч эхэлсэн. Гудамжинд явж байхад тэд над уруу дайрдаг байв. Би галзуу хүн шиг агаарт гараа савчин ямар нэг зүйлд хөөгдөж байгаа мэт явахад хэдийгээр би өөрөө тэднийг харж чадах боловч бусад хүмүүст харагдахгүй учраас эвгүй байдалтай харагддаг байв. Тэд 4 удаа ийнхүү дайрснаас эцэст зогссон. Дараа нь Далайн Хатан өөрөө над уруу дайрч эхэлсэн. Эхний өдөр тэр гэрийн хажууд машинаар ирж зогссон. Тэр жирийнхээрээ маш сайхан хувцасласан гоо үзэсгэлэнтэй эмэгтэй шиг харагдаж байв. Хөршүүд маань түүнийг миний найз охин гэж бодож байв. Гэнэт тэр гэрт орж ирэхэд түүнийг хэн бэ гэдгийг нь би шууд мэдсэн. Тэр үед өдрийн 12 цаг хүн багатай үе байсан. Тэгээд тэр “Чи сүмдээ явж болно, хүссэн зүйлдээ итгэж болно. Гагцхүү намайг битгий илчлээрэй, би чамд хүссэн болгоныг чинь өгье“ гэж надад хэлсэн. Би тэр үед Библийг мэддэггүй байсан учраас өрөөн дотор холхих түүнийг харж зогссоор байсан. Тэр намайг өөртөө эргэж ирэхийг гуйсаар байв. Би түүнд үгүй ч гэсэнгүй бас за ч гэсэнгүй. Дараа нь тэр босч машиндаа сууж явсан. Бараг 2 удаа манай нагацын эхнэр түүнийг хэн бэ гэдгийг нь мэдэхгүй зочилж дайлсан байв, гэвч би түүнд юун эмэгтэй болохыг хэлээгүй. Далайн Хатан сүүлчийн уулзалт дээрээ аргаа өөрчилж эхлэсэн. Тэр надад хатуу сануулга өгөхдөө түүний удаа дараагийн ирэлтэд миний хэрхэн зөрүүд хандсан нь түүнийг дахин харж буй сүүлчийн уулзалт гэв. Хэрэв би татгалзсан энэ чигээрээ үлдвэл тэр 8 сард над дээр ирэхдээ намайг нэг бол ална, нэг бол тахир дутуу болгоно, нэг бол золиос болгоно гэв. Ингэж хэлээд тэр буцсан.

Би айдаст автаж, нэгэн удаа сүм дээр очиж сүмийн нэгэн гишүүнтэй уулзсан. Би түүнд өөрийнхөө байдлыг хэлсэнд тэр надад Scripture Unions байгууллагын хаягийг бичиж өгөв. Би тэр ахыг дахиж олж хараагүй, хотод түүнийг дахиж хаанаас ч хайгаад олоогүй. Дараагийн өдөр зааж өгсөн газар уруу такси барин очив. Тэнд байсан нарийн бичиг тэдний байгууллагын манай гэртэй хамгийн ойролцоо байж болох цуглааны хаягийг надад өгөөд Бүтэн сайнд ир гэв. Би Fellowship Centre - St. Michael's State School, Rumuomasi цуглаан дээр Бүтэн сайнд өдрийн 2 цагт явж очиход 3 цагт эхлэх үндсэн цуглааны өмнөх залбирлын цуглаан дээр ирсэн байв.

Цуглааны дараа би зөв газар ирснээ мэдсэн. Бурхан надад нэгэн итгэгч эгчийг өгсөн нь миний сүнслэг ээж болсон бөгөөд надад Библийн үгийг тайлбарлаж хэлж өгч бас миний амьдралд зөвлөж эхэлсэн. Цуглааны ах дүү нар надад санаа тавьж, би тэнд жинхэнэ хайр гэж юу болохыг ойлгосон. Ариун Сүнс надад Үгийг ойлгох ухаан өгч аажмаар миний итгэл өсч эхэлсэн. Далайн Хатан хэлснийхээ дагуу ирэх өдрөө ирээгүй. Дуулал 91 болох Бурханы хамгаалалт миний амьдралд бодит биелэлээ олов. Исаиа 54:17 “Чиний эсрэг бүтээгдсэн нэг ч зэвсэг бүтэлтэй болохгүй. Шүүх дээр чиний эсрэг боссон хэл бүр яллагдана. Энэ бол ЭЗЭНий зарцуудын өв бөгөөд Надаас ирэх тэдний зөвтгөл юм” бас бодит биелэлээ олсон.

1985 оны 9 сард Silver Brand Cement компанийн албан ёсны дистрибютер болсон гэх мэдээ хүлээж авав. Ингээд 9 сарын 27 гэхэд намайг офис дээр ирэх хэрэгтэй гэв. Би 9 сарын 26-нд Порт Харкуртаас Лагост ирэв. Дараагийн өглөө нь намайг офис дээр очиход надад өгөх ёстой байсан хувийг өөр хүн авсан гэх мэдээг хүлээж авав. Тиймээс дараагийн өдөр менежертай ирж уулзах хэрэгтэй гэв. Тэндээс гараад байр уруугаа явж байтал нэг хүн миний хойноос дайрч хоолойноос минь боож эхлэв. Тэр бас миний ам хамрыг зэрэг гараараа хаав. Би амь тэмцэн орилоход хажуугаар хүмүүс зөрөн өнгөрч байсан боловч нэг нь ч надад туслах гэсэнгүй. Гэвч Эзэн намайг гайхамшигтайгаар аварсан. Намайг тэр үл таних хүний гартай ноцолдож байх хооронд эмэгтэй хүний орилох дуу сонсогдож, намайг барьж байсан гар суларснаа “Хэн чиний ард байгаа юм бэ?” гэж орилов. Тэр дахин нэг орилсноо алга болсон. Түүний дуу хоолойгоор над уруу эмэгтэй хүн дайрсан гэснээс өөр зүйл би мэдэж чадаагүй. Балмагдаж цочирдсон би байр уруугаа буцав.

Байран дээр ирэхэд байрны эзэн намайг ууртайгаар угтав. Чи мөнгөө төлөлгүй яагаад надаас зугтаад байгаа юм бэ? Би түүнд учир байдлаа тайлбарлаж ажилд орж мөнгөтэй болонгуутаа төлнө гэдгээ хэлсэн боловч түүний надад хандаж байгаа байдлаас анхнаасаа намайг энд төлөвлөгөө зохиож авчирсан нь тодорхой болов. Дараачийн өдөр би менежертэй уулзахаар очиход миний хувийг өөр хүнд андуурч өгсөнд уучлал хүсэв. Гэтэл бидний ярьж байсан өрөөнд нэгэн залуу орж ирж надаас шууд “Чи Емманүел мөн үү?” гэв. “Тийм, би байна” гэсэнд “Одоо л чи баригдав уу. Биднээс чи хаашаа ч зугтаж чадахгүй. Бид чиний араас Порт Харкуртад очсон боловч чиний сүнслэг ээжээс болоод чамтай уулзаж чадаагүй. Тэр эмэгтэй бидэнд том саад байсан, чи одоо Порт Харкурт уруугаа буцаж чадахгүй. Чиний хувийг авсан хүн би байна” гэв. Би түүнд “Чи надад юу ч хийж чадахгүй” гэж хариу хэлсэн. Менежер болж байгаа үйл явдалд гайхаж алмайрч орхисон байв. Би уучлалт хүсээд офисоос гарч явсан.

Байранд ирээд хэсэг зуур болж байтал хаалган дээр хүн тогших чимээ сонсогдов. Нина (орч. нууцлаг нийгэмлэгт хамт зүтгэж байсан эмэгтэй) ирсэн байв. Тэр намайг Порт Харкурт уруу буцаж явах уу гэж асуухад би явна гэв. Тэр намайг нийгэмлэгт буцаж ирэхийг гуйж бидний дуусгаагүй орхисон үүрэг даалгаврын тухай сануулав. Эдгээр нь:

-          Муу хүчний төлөөлөгчдийн удирдагч болох

-          Далайн удирдах өрөөний эзэн болох, үүнд дэлхийд болж буй үйл явдлуудыг хянах, сигнал явуулах ба хүлээж авах, муу хүчнүүдэд тусламж үзүүлэх гэх мэт

-          Далайн Хатаны дараахь эрх мэдэлтэн болох, үүнд ёслол, золиос, Далайн Хатаны удирдах тусгай даалгавар гүйцэтгэх зэргээс гаднах өөр тайлбарлахад төвөгтэй бусад үүрэг даалгаврууд хамрагдаж байв.

-          Харанхуйн хүчний тусламжтайгаар нууцлаг шашны нийгэмлэгийг бусдад хор нөлөөгүйгээр залуу хүмүүс болон сүмд явдаг хүмүүсийн дунд байгуулах

Хэрэв Нинатай нэгдвэл намайг давхар хувь, ивээлүүд хүлээж буй гэв. Миний гэрт байсан далайн бэлгүүд бусад зүйлсийг тэд хэрхэн авсан хийгээд нагац маань миний байшинг хэрхэн нурааж намайг заналхийлсэн нь бүгд тэдний зохион байгуулсан үйл ажиллагаа гэв. Хэрэв би тэднээс татгалзсан хэвээр байвал тэд над уруу дайралтаа улам ихэсгэх бөгөөд энэ удаад тэд миний сүнслэг ээж уруу дайрахаар төлөвлөх болно, яагаад гэвэл түүнийг устгах нь намайг устгахтай адил гэж байв. Гэнэт би босч Нинад номлож эхэлсэн. Нина “тэд чамайг хуурч байна” гэсээр гарч явсан. Энэ зүйл 1985 оны 9 сарын 28-ны орой болсон юм.

Ойролцоогоор 15 минутын дараа хаалга дахин тогших чимээ гарав. Энэ удаад 4 хүн байв. Тэд намайг гэрээсээ гарч ирэхийг гуйв. Бид гудамжинд гарч зогсоход тэдний нэг нь “биднийг мэдэх үү” гэв. “Үгүй” гэхэд танай байрны эзэн биднийг хөлсөлсөн, чамайг бид алахаар ирсэн гэж хэлж байх хооронд тэднийн нэг нь гар буу, бас нэг нь тонгорог гаргаж ирэв. Ямар ч найдваргүйээгээр ингээд үхдэг юм байхдаа гэж бодов. Гэвч Бурхан гайхамшигтай аргаараа намайг аврахад намайг байтугай тэднийг цочирдуулсан. Гар буутай залуу над уруу онилж гохоо дартал ямар ч дуу чимээ гарсангүй, нөгөөх нь миний ар нуруунаас тонгоргоороо дайрахад миний бие яг л төмөр мэт болсон мэт нэвтэрээгүй. Тэд надаас ч илүү айсан байв. Гэнэт Ариун Сүнс миний дотор дүүрч би номлож эхэлсэн. 3 залуу нь амь тэмцэн зугтацгааж, нэг нь миний өмнө өвдөг сөгдөн өөрийнх нь төлөө залбирахыг гуйв. Би түүний төлөө юу гуйхаа мэдэхгүй байсан учраас “Эзэн минь ээ, түүний гэм нүглийг уучилж, мартаж, өршөөлөө үзүүлээч. Амен! гэж товчхон залбирав. Тэр Есүст итгэхээр шийдсэн учраас би түүнийг нэгэн Пентекост сүмд аваачиж пастортай уулзаж танилцуулав. Түүнийг сүмд орхиод байранд эргэж ирэхэд байрны эзэн намайг тосон гүйж, өөрийг нь уучлахыг гуйгаад, удаан хугацааны турш өрөө бага багаар төлж байхыг зөвшөөрөв.

Тэр шөнөдөө Эзэн намайг шөнийн 2 цагт сэрээв. Би яагаад сэрснээ мэдэлгүй том өрөө рүү ортол миний өмнө нэгэн том яст мэлхий зогсож байгааг харсан. Гэнэт би Порт Харкуртад байхдаа судалж байсан Библийн Үгийг санаж, Үгийн хүч чадлын тухай санасан. Тэр даруй би “Намайг энэ дэлхий дээр бүтээгдсэнээс хойш яст мэлхий чинийн хувь тавилан газар дорх усанд эсвэл хуурай газрын бутан дундуур явахаар бүтээгдсэн. Миний байшингийн цонх хаалга түгжээтэй байсаар байтал чи энд орж ирсэн нь чамайг гэм нүгэлтэй болгосон. Тиймээс чи үхэх болно “ гэж залбирч эхэлсэн. Гэнэт яст мэлхий алга болсон. Би эргээд унтсан. Хоёр дахь удаагаа би том өрөөнд гарах чимээгээр сэрсэн. Би сэрж том өрөө уруу ороход миний өмнө аймшигтай амьтан зогсож байгааг харсан. Би дахин залбирч эхлэн “... чи гэм нүглийнхээ үр дүнд үхэх болно” гэж хэлэх мөчид тэр амьтан алга болсон. Лагос дахь энэ аялалын үеэр би Бурханы сайн сайхан, агуу, итгэмжтэй байдлыг мэдсэн.

Дараагийн өглөө 1985 оны 9 сарын 29-ны өглөө би Порт Харкурт уруу явах автобусанд суув. Гэвч Оре хотын ойролцоо автобус мод уруу орж осолдсон. Автобус гадна талаасаа эвдэрч нэг ч хүн бэртсэнгүй. Жолооч автобусаа зам дээр буцаан гаргаж бид аялалаа үргэлжлүүлсэн. Гэвч автобус хоёр тийшээ холбин тогтворгүй явж эхлэв.  Гэнэт би Нинагийн хэлсэн заналхийлэлийг санаж, босч зогсон, зорчигчдод номлож эхэлсэн. Номлолын эцэст “Надаас болж энэ осол тохиолдсон. Одоо бид Порт Харкурт хүртэл ямар ч аваар осолгүйгээр тайван явж хүрэх болно. Есүсийн нэр дээр тушааж байна” гэж хэлсэн. Би сандал дээр эргээд суухдаа яагаад тэгж хэлснээ ойлгоогүй. Гэвч миний хэлсний дагуу бид аялалаа тайван хийж дуусгасан. Ямар ч осол, ямар ч эвдрэл сааталгүйгээр Порт Харкуртад хүрсэн. Библид “Хэрэв хэн нэгэн нь чам уруу хэрцгийлэн халдвал, тэр нь Надаас биш юм. Чам уруу халдагч нь чамаас болж унана“ гэж хэлсэн (Исаиа 54:15). Далайн Хатан болон түүний төлөөлөгчид над уруу дайрсан боловч тэд Бурханы эсрэг түүний хүүхэд рүү дайрсан учраас ялагдаж унасан. Библид “Өрнө зүгт хүмүүс ЭЗЭНий нэрээс эмээн, наран ургах зүгт тэд Түүний алдраас айна. Дайсан голын урсгал мэт ирвэл ЭЗЭНий салхи түүнийг хөөж явуулна” гэж хэлсэн (Исаиа 59:19). Миний талд бүх хүч чадлаа харуулсан Бурханд бүх алдрыг өргөе. 
Үргэлжлэл дараахь линкээр орно уу.

http://jesus-faith.blogspot.com/2014/04/7-8-9.html

FAITH IS ...

Амьдралын минь хүнд хэцүү үед миний итгэлийг урамшуулдаг эдгээр үгсийг би унших дуртай. Танд ч бас урмыг өгөг гэж залбиръя.

Итгэл гэдэг бол салхи мэт. Чи түүнийг харж чаддаггүй ч байгаа гэдгийг нь мэддэг.

Итгэл бол бидний бат зогсох суурь эсвэл биднийг нисгэж сургах зүйл.

Итгэл бол Бурхан хийж чадна гэдэгт зөвхөн итгэх биш харин Түүнийг хийж өгнө гэдгийг мэддэг.

Чиний итгэл айдсаас чинь илүү байг.

Чиний итгэл хүний мэргэн ухаанд биш Бурханы хүч чадалд найдаг.

Итгэл бол нүд чинь харанхуйг харж байвч зүрх сэтгэлдээ гэрлийг харахтай адил.

Итгэл найдвар бол шувууны далавч мэт. Найдвар байгаа газар итгэл байдаг, итгэл байгаа газар гайхамшиг байдаг.

Заримдаа танд бодож, тунгааж, төсөөлж, санаашрах шаардлагагүй. Зүгээр л гүн амьсгаа ав. Итгэ. Учир нь гайхамшиг тохиолддог юм.

Амьдрал чамайг хичнээн унагавч итгэлээ хадгал.

Дайсан чамаас хулгалсан бүх зүйлийг итгэлээрээ ав.

Бурханд итгэх итгэл бүх зүйлийг өөрчилдөг.

Итгэл бол нүдэнд үл үзэгдэх зүйл бөгөөд түүний шагнал нь итгэж буй зүйлээ харах явдал юм. 

Харанхуйн хүчнээс чөлөөлөгдсөн нь 5-р бүлэг

5-р бүлэг: Есүс Христтэй учирсан нь

1985 оны 2-р сард бид далайд ээлжид хурлаа хийсний дараа би Риверс мужийн Порт Харкурт хот уруу авга ахынхаа эхнэр дээр зочлон очихоор шийдэв. Би тэнд Антони хэмээх нэгэн залуутай уулзсан. Тэр Порт Харкуртын Транс-Амадины зам дагуу Нважагийн уулзвар дээр нэгэн мужааны цехтэй бөгөөд нэгэн өдөр тэр над уруу утсаар залгасан юм. Манай нууцлаг шашны хууль дүрмийн дагуу хэрэв хэн нэгэн утсаар залгавал заавал хариулах ёстой байдаг учраас би түүний дуудлагад хариулахаар шийдэв. Би тэр долоо хоногийнхоо Пүрэв гаригт түүн дээр зочлон очив. Тэр надад Бурханаас надад хандсан үг байна гэв. Тэр библиэ гарган ирж номлож эхлэсэн. Тэнд надаас гадна нэг эрэгтэй, 2 эмэгтэй итгэгчид байсан. Түүний номлол ихэд урт байсан учраас би заримыг нь сайн санахгүй байлаа. Тэр намайг өвдөг сөгдөөд Бурханд залбир гэв. Би үгийг нь дагаж өвдөг сөхрөв. Тэр гэнэт залбирч эхлэсэн. Яг тэр үед Бурханы Сүнс намайг цохиж би газарт унасан. Би нилээд тэмцэлдсэний эцэст арайхийн хөл дээрээ босч зогссон. Би өөрийгөө төмөр болгон хувиргаж \орч. хэдийгээр гаднаасаа хүн шиг харагдах боловч сүнслэг ертөнцөд төмөр болон хувирсан гэсэн үг\, тэр цехэд байсан бүх төмөр сандлуудыг эвдэж хаясан. Намайг цонхоор гадагш харахад манай нийгэмлэгийн 3 хүн, нэг залуу, 2 охин ирсэн байгааг харсан. Тэд хүний дүр төрхтэй байсан бөгөөд намайг аврахын тулд хаалга уруу ойртохыг хичээж байсан боловч Бурханы хүч чадлын улмаас хаалганд ойртож чадахгүй байсан.

Намайг хэцүү байдалд орлоо гэсэн ямар нэг сигнал далайд очиж, өнөөх шидэт телевизээр миний байршлыг тодорхойлсны дараа эдгээр ямар ч “авралгүй” 3 залууг над уруу илгээсэн нь тодорхой байлаа. Биднээс хэн нэг нь зовлонд ороход ийнхүү аврах багийг илгээдэг байв. Хэдийгээр итгэгч 2 залуу миний өвдгийг газарт сөхрүүлж, 2 эмэгтэй миний төлөө залбиран муу сүнснүүдийг хүлж байсан боловч тэдний залбирал тодорхой бус байлаа. Тэд надаас Есүс Христэд итгэдэг эсэхийг асуухад би хариулаагүй, дараа нь тэд надаас Есүсийн нэрийг дууд гэхэд нь татгалзсан. Тэд надаас миний нэрийг асуухад нь би хэлсэн. Олон цагийн турш надтай тэмцэлдсэний эцэст тэд намайг чөлөөлөн явуулав. Надаас ямар ч муу сүнс зайлсангүй, би ирсэнтэйгээ адил хэвээр гэр уруугаа буцсан.

Сүм дээр тохиолдсон явдал

Дараачийн өдөр Баасан гаригт Антони намайг Assemblies of God church сүмийн оройн цугларалтанд урив. Би урилгыг хүлээн авахаар шийдэв, учир нь сүмд төөрөгдөл, идэвхгүй байдал бий болгох нь бидний үүрэг даалгавар байлаа. Цуглаан магтан дууны найрал дуугаар эхлэв. Бид үргэлжлүүлэн магтан дуулсаар сүмийн нэг гишүүн нэгэн хамтлагийн алдартай дууг дуулах хүртэл үргэлжлүүлсээр.

Гэнэт би хөхөрч эхлэв. Учир нь найрал дуунд дуулж буй хүмүүсийн 3/4 гэм нүгэлтэй амьдралтайгаа хэвээр байгааг би сүнслэг ертөнцөд хараад хөх инээд минь хүрч байв. Учир нь хэрэв итгэгч хүн гэм нүгэлтэйгээ амьдарсан хэвээрээ байвал энэ нь түүнийг сүнслэг ертөнцөд муу сүнсэнд олзлуулахад илчилж өгдөг бөгөөд амьдрал нь ээдрээтэй төвөгтэй байдалд ордог. Тиймээс итгэгч хүн Бурханы Үгийн дагуу амьдарч өөрсдийнхөө амьдралд аливаа гэм нүгэл орших боломж олгохгүй байх нь маш чухал. Тэр цуглаан дээр манай нийгэмлэгийн 4 хүн, итгэгч нартай хамт алгаа ташин магтан дуулж байлаа. Энд би нэгэн зүйлийг онцлон хэлэхийг хүсч байна, хэрэв та аливаа сүм чуулганд ирэхдээ эхлээд өөрийнхөө амьдралд буй гэм нүглээ уудлан илчилж уучлалт гуйж, дараа нь Бурханы оршихуйд магтаал хүндлэлийг өргөх юм бол та нарын дунд байж болох Сатаны ямар ч хүч, төлөөлөгчдийг эвгүй байдалд оруулж, улмаар тэднийг амиа аврахын тулд Бурханы ариун газраас зугтахад хүргэдэг.

Энэ цуглааны үеэр бидэнд маш тааламжтай нөхцөл байдал бүрдсэн бөгөөд бид үйл ажиллагаагаа эхэлсэн. Олон хүмүүс унтаж эхлэн, найрал дуучид хүч чадалгүй болж бүх зүйл удирдлага хяналтаас гарч эхлэсэн. Антони миний тухай цуглааныханд аль эрт хэлсэн байсан учраас шөнийн 2 цагийн орчимд тэд миний төлөө залбирахаар намайг дуудан гаргаж ирэв. Намайг урагш гарч ирэнгүүт тэд миний дээр Есүсийн цусыг тунхаглаж эхлэв. Би тэдэнд “Зөвхөн Есүсийн цусыг тунхаглах нь хангалттай биш. Би бол нууцлаг шашны нийгэмлэгт гүнзгий орсон хүн. Хэрэв та нар намайг чөлөөлж чадна гэж итгэж байгаа бол би өвдөг сөгдөн залбиръя” гэж хэлсэн. Би ийм үг хэлнэ гэж төлөвлөөгүй байсан. Есүсийн цус муу сүнснүүдийг айлган чичрүүлж, итгэгчдийг тэднээс хамгаалдаг боловч муу сүнснүүдийг хүлж хязгаарладаггүй. Хэрэв итгэгч хүн өөртөө байгаа эрх мэдлийг ашиглаж тушааж эхлэх юм бол муу сүнснүүдийг хүлж хязгаарлаж чадна.

Тэд миний төлөө залбирахаар зөвшөөрч, би газар сөхрөн суусан. Яг тэр үед нэг эмэгтэй Ариун Сүнсээр “Хэрэв та нарын дотроос өөрийгөө хангалтгүй гэж үзэж байгаа хүн байгаа бол энд бүү зогс!” гэж хэлсэн. Тэнд байсан хүмүүсийн ихэнх нь эмэгтэйн юу яриад байгааг тийм ч сайн ойлгоогүй байх. Хэрэв итгэгч хүн гэмтэй амьдралтайгаа зууралдсан хэвээр байгаа бол муу сүнсийг зайлуулах гэж оролдох нь аюултай ажил. Тэднээс олонх нь суудал уруугаа буцаж цөөн хүн миний төлөө залбирахаар зогсов. Тэд Есүсийн нэрийг дуудаж эхлэнгүүт миний дотор ямар нэг юм дэлбэрэх шиг болж би газар цээжээрээ унасан. Гэнэт миний дотор байсан нисэх чадалтай муу сүнс хөдөлж намайг цээжээр минь газар мөлхүүлж эхэлсэн. Миний төлөө залбирч байсан хүмүүсийн хэн нь ч сүнслэг ертөнцөд юу болж байгааг мэдэхгүй байлаа. Тэр газар дахь муу сүнсний хүч чадлын улмаас би цээжээрээ газар мөлхөж байсан. 

Сайн муугийн хоёр хүч тулалдсаар орчны уур амьсгал өөрчлөгдөж эхлэсэн. Би гэнэт босч зогсож хэрцгий авирлаж эхэлсэн. Нисдэг муу сүнс надаас гарч цуглааныхны дунд байсан нэгэн хүү уруу дамжихад тэр хүү хүмүүс уруу дайрч намайг чөлөөлөх гэж оролдов. Сүмийн ахлагч нар хүүтэй зууралдаж эхлэн айдаст автсан бусад хүмүүсийг болон хүүг өөр танхим уруу оруулж хаалгыг дотроос нь цоожилсон. Энэ байдал өглөөний 7 цаг хүртэл үргэлжилсний эцэст би маш их ядарч номхон болсон. Ахлагч нар дахин миний төлөө залбирахаар намайг тойрч зогсоод “Нэрийг нь хэл. Тэд хэн бэ?” гэж асуухад би юу ч дуугараагүй. Тэд надаар үг хэлүүлэх гэж удаан оролдсон боловч эцэстээ тэд намайг чөлөөлөгдсөн гэдэгт итгэж залбирлаа дуусгасан. Би маш их сульдсан байсан бөгөөд арай ядан хөл дээрээ тогтож ядсаар сүмээс гарсан. Гэвч зам хөндлөн гарсны дараа миний бие дахин хүч чадалтай болж, бодвол миний биенээс зайлуулагдсан сүнснүүд эргэж ирсэн байх л даа, миний дотор уур хилэн бадарч, цуглааны тэдгээр хүмүүсээс өшөөгөө авахаар шийдсэн. “Эдгээр хүмүүс намайг гутамшигтай байдалд оруулсан. Тиймээс би Лагос уруу буцаж очиж улам илүү их хүч чадлаар дүүрсний дараа цуглаан дээр буцаж ирж эдгээр хүмүүсээс өшөөгөө заавал авна даа” гэж дотроо шийдсэн.

Лагос уруу аялсан нь

Дараа нь би авга ахынхаа эхнэрийн гэрт буцаж очоод Лагос уруу явах болсноо хэлэв. Намайг явуулахгүй гэсэн тэдний ятгалгаас хурдан ангижрахын тулд би Майле-3 тээврийн товчоо уруу хүргэх такси хөлслөв. Тэндээсээ би Ониша хот уруу явж, нэгэн найзтайгаа уулзсаны дараа Лагос уруу явахаар болов. Би Майле-3 тээврийн товчоон дээр бууж Омагве уруу явах унаанд суув, гэнэт хэн нэгэн намайг “Нкем” гэж миний багийн нэрээр дуудахыг сонссон. Таксин дотор таньдаг ямар нэгэн хүн байгаа эсэхийг нягтлан харахад хэн ч байгаагүй. Хэн намайг дуудав? Зөвхөн ээж минь намайг энэ нэрээр дууддаг байсан, бусад хүмүүс болон нууцат шашны нийгэмлэгийнхэн намайг энэ нэрээр минь мэдэхгүй дээ! Тэд зөвхөн Имманүел гэж мэднэ. Ийн бодсоор гайхширч байх хооронд дахин “Нкем ээ, чи надаас урвахаар шийдээ юу?” гэсэн дуу гарсан. Би тэр дуу хоолойгоор чухам хэн байж болохыг таниагүй ч “Чи надаас урвахаар шийдээ юу?” гэж дахин асуухыг сонсов. Гэнэт би хүчтэй халуурч эхлэсэн. Миний биений халууныг таксинд сууж байсан бусад хүмүүс мэдэрч эхлэсэн, тэднээс нэг нь “Эрхэм ээ, та энэ байдалтай аялж чадах юм уу?” гэхэд нь өөрийгөө би амьдралдаа хэзээ ч өвдөж байгаагүй, толгойны өвчин ч хүрч байгаагүй, миний бие зүв зүгээр гэж хэлсэн. Умуакпа хүрэх үед би таксин дотор ухаан алдан унасан. Ухаан орох үед хоёр чийрэг өндөр хүн миний хоёр талаас өргөн явж байгааг мэдсэн. Тэд надтай юу ч дуугараагүй, бидний явж буй зам шил, төмрийн хэлтэрхий болсон бартаатай зам байсан. Миний хөл тэдгээр шил, төмрөнд зүсэгдэж би өвдсөндөө ёолон орилоход тэд юу ч дуугаралгүй явсаар байсан. Бид явсаар нэгэн өргөн их зам дээр гарч ирсэн. Тэдний нэг нь надад “Чамайг энд авчрахыг бидэнд тушаасан” гэж хэлсэн. Бид цааш явсаар нэгэн “Хурлын танхим” мэт өндөр нүсэр том барилгын өмнө ирсэн. Биднийг явган хүний зам дээр гарч зогсоход хэн нэгэн “Түүнийг дотогш оруул” гэж хэлэх нь сонсогдсон. Тэд намайг дотогш оруулж ганцааранг минь үлдээсэн. Энэ барилгын дотор юу харснаа тайлбарлаж хэлэхэд хэцүү боловч аль болох тодорхой тайлбарлахыг хичээе. Барилгын хананууд маш уран гоё чимэглэлтэй байсан бөгөөд асар уудам өргөн танхимтай, танхим төгсгөлгүй мэт алсад үргэлжилсэн байсан. Би төгсгөлийг нь харах гэж танхимын гол хэсэгт очиж зогсоход танхимын төгсгөлд тахилын ширээ байгааг харсан. Мөн нарыг тойрон эргэлдэх сар од гариг эрхсүүдийг харсан. Дараа нь нэгэн сэнтийг харсан бөгөөд нар мэт гэрэлтсэн хувцастай, маш үзэсгэлэнтэй нэгэн хүн сууж байгааг харсан. Тэр хүн “Нааш ир” гэж хэлэхэд би түүнээс цацрах хурц гэрлийн улмаас болж хөдөлж чадаагүй. Хөлөө хөдөлгөх болгонд газар сөхрөн унаж байсан.

Би босч зогсохыг оролдож дахин өөд боссон боловч газар сөхрөн унасан. Гэнэт Түүний сууж байсан сэнтийний хажуугаас сар гарч, миний дээр ирж тогтсон. Тэр сарнаас хоёр гар гарч ирэн миний толгойноос барин биеийг минь сэгсэрч эхлэхэд хувцас тайлах мэт миний бие сүнснээсээ салгагдаж, би өөрөөрөө зогсож байгааг мэдэрсэн. Тэр хоёр гар миний биеийг хувцас мэт эвхэж, танхимын буланд тавьсан. Дараа нь сар эргэж сэнтий уруу буцаж очин сэнтий дээр суугч Нэгэн уруу орж алга болоход Сэнтийн дээр суугч нэгэн намайг Нааш ир гэж дуудсан.

Сүнсний цэвэрлэгээ

Би Түүн уруу ойртоход Тэр сэнтийнээсээ бууж ирсэн. Тэр миний хоёр хөлийг нэг нэгээр нь салган дотроос нь ямар нэгэн зүйл сэгсрэн хаяж хөлийг минь буцааж хийсэн. Тэр бас гарыг минь нэг нэгээр нь салгаж, мөн адил зүйлийг хийсэн. Тэдгээр зүйлүүд бүгд үнэндээ Далайн хатны миний биед хийж шингээсэн бузар зүйлсүүд байсан. Би дотроо “Энэ хүн хэн бэ? Яаж миний биед нуугдсан зүйлүүдийг мэдэж байна вэ?” гэж бодож байсан. Дараа нь Тэр сэнтий уруу буцаж суугаад намайг дуудсан. Түүн уруу ойртоход миний биенээс ямар нэг зүйлүүд унаж байгааг жишээ нь: нүднээс минь хайрсархуу юм унаж байгааг мэдсэн. Сэнтийний өмнө ирэхэд надаас юм унахаа больсон. Тэр надаас “Чи хаашаа явж байна вэ?” гэж асуув.

Би “Ониша хот уруу найзынх уруугаа явж байна” гэж хариулсан. “Тийм ээ, чи тийшээ явж байсан гэвч чиний оюун бодолд юу байсныг би чамд харуулъя” гэв. Энэ цаг мөчийг хүртэл би түүнийг хэн бэ гэдгийг огт мэдэхгүй байсан боловч ямар ч байсан миний амьдралдаа урьд өмнө таарч байсан бүх хүчнүүдээс харьцуулшгүй их хүч чадалтай гэдгийг мэдсэн. Тэр нэгэн хүнд хандаж, миний оюун бодолд юу бодогдож байсныг харуулахыг тушаасан. Тэр хүн, намайг нэгэн өрөө рүү аваачиж миний өмнө хар самбар шиг юмыг дэлгэсэн. Хэрэв би өөр нэг тийшээ зугтааж чаддагсан бол яг л газрын гаваар алга болохсон гэж бодогдож байв, тэр самбар дээр Христэд итгэгчдийн эсрэг төлөвлөж байсан миний бүх хорон төлөвлөгөөг дурайтал нь бичсэн байв. Дараа нь тэр хүн намайг сэнтийний өмнө дахин авчрав.

Сэнтийн дээр суугч над уруу буун ирж миний гараас барихдаа надад нэгэн зүйлийг харуулах ёстой гэв. Тэр надад хэлэхдээ “Би чамайг алдахыг хүсэхгүй байна, энэ бол чиний сүүлчийн боломж, хэрэв чи над уруу ирж, надад үйлчлэхгүй бол үхэх болно. Би одоо чамд аврагдагсад болон дуулгаваргүй хүмүүсийн орших газрыг харуулах болно” гэж хэлсэн. Энэ үед би түүнийг Есүс Христ гэдгийг мэдсэн.

Тэнгэрлэг илчлэлт

Бид нэгэн өрөөнд орж ирэхэд Тэр нэгэн хөшиг шиг зүйлийг нээсэн. Би дэлхийг харсан, дэлхий доторх үйл явдал, хүмүүсийн амьдрал, үйл хөдөлгөөн бүх зүйлүүдийг харж эхэлсэн. Тэндээс би Христэд итгэгчид болон үл итгэгчдийн хийж байгаа үйлдлүүдийг харсан. Дараа нь бид хоёр дахь өрөөнд очсон. Тэр дахин хөшиг шиг зүйлийг нээхэд миний өмнө маш өрөвдмөөр гашуудам дүр зургийг би харсан. Тэнд хүмүүс гинжлэгдэн дөнгөлөгдсөн байх бөгөөд уй гашууд автсан байсан.  Тэр надад “энэ бол хоёр нүүртэй хуурамч хүмүүс. Тэд шүүлтийн өдрийг хүртэл энд байх болно” гэв. Дараа нь бид гурав дахь өрөө уруу очсон. Тэр хөшгийг нээхэд миний өмнө баяр хөөртэй цагаан хувцастай хүмүүс байхыг харсан. Би түүнээс эдгээр хүмүүс хэн болохыг асуухад тэр “Тэд бол шагналаа хүлээж буй аврагдсан хүмүүс” гэв.

Дараа нь бид дөрөв дэх өрөөнд ирсэн. Би энд хамгийн аймшигтэй зүйлүүдийг харсан.

Энд харсан зүйлүүдийг тодорхойлж хэлэхэд хэцүү. Энэ нь яг л галд автсан хот шиг харагдаж байсан. Там үнэхээр байдаг бөгөөд аймшигтай газар. Хэрэв та там, тэнгэрийн улс хоёр зөвхөн дэлхий дээр байдаг, үхлийн дараа бид оршин тогтнохгүй, хумхийн тоос мэт юу ч үгүй замхран алга болно гэж боддог бол би танд сануулан хэлье, там ба тэнгэрийн улсын аль аль нь бодитой байдаг. Есүс Христ энэ дэлхий дээр байхдаа тамын тухай сануулж хэлж байсанд гайхах хэрэггүй. Би дахин хэлье, там үнэхээр байдаг. Би тамыг өөрийн биеэр харсан бөгөөд үнэхээр аймшигтай газар. Би Түүнээс “энэ ямар газар вэ?” гэж асуухад “Энэ бол сатан, түүний элч нар ба дуулгаваргүй хүмүүст зориулагдсан газар” гэж хэлсэн. Илчлэлт 21:8-д “Харин хулчгар, итгэлгүй, жигшүүрт, алуурчид, завхай хүмүүс, мэргэ төлөгчид, шүтээнд мөргөгчид болон бүх худалч хүмүүсийн хувьд, тэдэнд оногдох хувь нь хоёр дахь үхэл буюу хүхэр, галаар шатаж буй нуурт байна” гэж хэлсэнчлэн Тэр тэдгээр хүмүүсийн талаар дурдаж хэлсэн.

Дараа нь бид тав дахь өрөөнд очиход гайхамшигтай үзэсгэлэнтэй дүр зургийг харсан. Бид яг л уулын орой дээрээс харж байгаа юм шиг харж байсан. Миний өмнө шинэ хот байсан. Хот үнэхээр үзэсгэлэнтэй, сүр жавхлантай харагдаж байсан! Гудамжууд нь алтаар хийгдсэн байсан бөгөөд барилга байшин нь энэ дэлхийн аль ч барилгатай зүйрлүүлэхийн аргагүй уран нарийн хийцтэй байсан. Тэр надад “энэ бол ариун хүмүүсийн итгэл найдвар байгаа газар. Чи энд ирэхийг хүсч байна уу?” гэж асуусан. Би түүнд “Тийм, хүсч байна!” гэж хариулсан. Үүний дараа бид сэнтийний өмнө эргэн ирж, Тэр надад “Одоо буц, юу үзэж харснаа хүмүүст гэрчлэн ярь” гэж хэлсэн.

Гэхдээ намайг тэндээс буцахаас өмнө тэр намайг дахин нэг өрөөнд аваачиж, миний аян замын талаар надад урьдчилан харуулж намайг хэрхэн аюулаас хамгаалахыг харуулсан. Дараа нь надад хэлэхдээ “Юунаас ч бүү ай, би чамтай хамт байх болно” гэж хэлээд өрөөнөөс намайг хөтлөн гаргахдаа алга болсон. Энэ үед би нэгэн хүний гэрт ухаан орсон. Би ухаан орохдоо маш чанга орилсон учраас гэрийн эхнэр нөхөр хоёр айсандаа гэрээсээ гарч зугтсан. Тэд намайг байшингийн гаднаас хэсэг зуур ажиглаж байгаад аюулгүй гэдгийг мэдэнгүүтээ буцаж орж ирсэн. Тэд надад хэлэхдээ намайг таксинд ухаан алдахад тэд ойролцоох Католик сүм руу аваачиж, эмч дуудуулсан аж. Эмч миний зүрхний цохилт хэвийн байгааг үзээд сэхээ ортол хүлээхийг зөвлөсөн аж. Тэр зуур тэд намайг гэртээ авчирч хэвтүүлсэн нь миний сэхээ орсон газар байлаа. Тэд миний овог нэр, гэрийн хаягийг тэмдэглэж авсны эцэст гэртээ намайг хоёр хоног дуртайяа байлгахыг зөвшөөрөв. Тэгээд хоёр хоногийн дараа Ониша руу явах таксинд тэд намайг суулгаж өгөхөд би Эзэний хэлж зааварласны дагуу аялалдаа гарсан. Эзэний надад анхааруулж хэлсэн бүх болгоомж сануулгууд бүгд нэг нэгээрээ аян замын туршид илчлэгдэж байсан нь Эзэн над шиг хамгийн их гэм нүгэлтэй, Сатаны төлөөлөгч болсон хүнийг яагаад аварсан юм бол гэж бодоход хүргэж байсан. Гэхдээ би миний бүх асуултын хариулт гуравхан үгэнд багтаж байсан. Бурхан бол Хайр. Тиймээ, үнэхээр, Бурхан бол Хайр! 
Үргэлжлэл дараахь линкээр орно уу.

http://jesus-faith.blogspot.com/2014/03/6.html