Тэнгэрийн улс

Би өмнөх 2 дугаартаа Мари К.Бакстерийн бичсэн тамын тухай түүхийг орчуулан тавьсан билээ. Одоо тэгвэл Мари К.Бакстерийн тэнгэрийн улсад очсон түүхээс хуваалцъя гэж бодлоо. Тэр тамд очсоныхоо дараа Есүстэй хамт тэнгэрийн улсад очин тэнд олон гайхамшигтай зүйлүүдийг харснаа ном болгон бичиж олны хүртээл болгосон байна. Энэ түүх та бүхнийг урамшуулна гэдэгт итгэж байна.
Энэхүү түүхийг бүтнээр нь уншихыг хүсвэл татах гэдгээр орж уншина уу.

Татах

Есүс, Катринд хэлсэн үгсМиний чамд харуулах зүйлүүдийг
Бичиж тэмдэглэж тунхаглахын тулд
Чи төрсөн
Эдгээр зүйлүүд нь итгэмжтэй бөгөөд үнэн
Чиний дуудлага бол энэ дэлхийд
Тэнгэрийн улс ба тамын тухай мэдүүлэхийн тулд юм
Есүс, би, тэднийг тарчлал зовлонгоос аварч
Тэдэнд зориулан тэнгэрийн улсыг бэлтгэхийн тулд
Эцэгээсээ илгээгдсэн билээ.

Хаалгаар ороходБурхан өөрийн агуу их хайр өршөөлөөрөө намайг тэнгэрийн улс гэж нэрлэдэг тэр сайхан газар уруу орохыг зөвшөөрсөн. Тэр газар уруу би яаж очсон, тэндээс яаж эргэж ирсэн нь миний хувьд нууцлаг хэвээр үлдсэн. Гэхдээ тэнд би үнэхээр очсон гэдгээ мэддэг.
Над шиг гэм нүгэлтэй хүнд Бурхан яаж өөрийн тэнгэрийн улсын гайхамшгийг харуулсан юм бэ гэж би боддог. Би танд эхнээс нь авахуулаад яръя.
Нэгэн шөнө Эзэн над дээр ирж, намайг онцгой зорилгоор сонгосон гэдгээ хэлэв. Тэр “Миний охин, би хүмүүсийг харанхуйгаас аврахын тулд өөрийгөө чамд илчлэн харуулж байна. Би чамайг онцгой зорилгоор сонгож авсан. Миний чамд харуулах гэж буй зүйлүүдийг бичиж тэмдэглэ” гэсэн.
Би өөрийгөө Эзэнд бүрэн даатгахад гайхалтай зүйлс тохиолдож эхлэсэн. Би гэрээсээ хаа нэг тийшээ хөөрөн нисч, өөрийн биеэр тамд очсон. Тэнд байхдаа би бүх зүйлийг мэдэрч байсан. Би үзэж, сонсож, мэдэрч, амталж, үнэртэж байв. Энэ бүгд надад ер бусын санагдаж байсан. Энэ бүхэн ямар нэг зорилгоор өгөгдөж байсныг би ойлгосон.
Эзэн намайг там уруу авч явсан тэр өдрүүдэд би зүрх сэтгэлдээ маш их гашуудаж байсан. Тамд харсан аймшигтай зүйлүүдээс болж би маш их дарамт, уйтгар гунигтай болсон. Би тамд байгаа хүмүүсийн дээр болон гэм нүглийн дээр Бурханы шийтгэл хэрхэн ирж байгааг харсан. Би Бурханыг чин сэтгэлээсээ эрж хайн, түүний амар тайванг хүсч байв.
31 дэх өдрийн шөнө эдгээр бүх зүйлс тохиолдсоны дараа, Аугаа Хүчит Бурханы хүч чадал над дээр дахин бууж ирсэн. Шөнийн 2 цагт нэгэн том тэнгэр элч миний орны хажууд зогсож байв. Тэнгэр элчийн ард Есүс Христ зогсож байгааг хараад түүн уруу харахад над уруу инээмсэглэж байв. Гэхдээ надтай юу ч ярьсангүй.
Бурханы хүч чадалтай тэнгэр элч надад “Бурхан чамд нэгэн онцгой даалгаврыг өгсөн. Би чамайг тэнгэрийн улс уруу авч явж, зарим зүйлүүдийг харуулахын тулд ирлээ” гэв.

Хэсэг хугацааны дараа тэнгэр элч надад “Явцгаая. Бурханы алдрыг харагтун” гэв.
Гэнэт би ер бусын аргаар гэрээсээ хаа нэг тийшээ хөөрөн явж, нэгэн тэнгэр элч хамгаалан зогсож буй хаалганы дэргэд ирэв.
Би эргэн тойрондоо байгаа сүр жавхланг хараад амьсгаагаа ч авч чадахгүй байв. Тэнгэр элчийн өмссөн хувцаснаас хурц гэрэл цацарч байв. Тэнгэр элч солонгын өнгө шиг гэрэлтсэн далавчтай байсан. Хэдийгээр би энэ бүгдийг мэдэж байсан ч эргэн тойронд минь Бурханы үгээр хэлшгүй гоо үзэсгэлэн, сүр жавхлан гэрэлтэж байгааг харсан. Дараа нь миний сонссон зүйл бол миний олон удаа уншиж байсан “Бурханы алдрыг харагтун” гэж тэнгэр элч дуу алдахыг сонсов.
Миний өмнө байгаа сүр жавхлантай хаалга жинхэнэ сувдан хаалга байсан. Би гайхсандаа энэ бүгдийг мартахгүйг хичээн сайн харж авав. Эндээс эхлээд би Эзэнийг хараагүй бөгөөд тэнгэрийн улсын сүр жавхлан дотор би бүхэлдээ автагдсан.
Тэнгэрийн улс уруу оровБиднийг тэнгэрийн улсад ирэхэд 2 маш өндөр тэнгэр элч хаалганы хажууд зогсож байв. Хоёулаа цагаан гэрэлтсэн хувцастай байсан бөгөөд гартаа сэлэм барьсан байв. Тэдний үс алт шиг шаргал өнгөтэй, нүүр нь гэрэлтэн харагдаж байв.
Надтай хамт явж байсан тэнгэр элч намайг орхин хаалгыг манаж байсан тэнгэр элч нар уруу явав. Би гайхсандаа “Тэнгэрийн орны хаалга ямар сүр жавхлантай юм бэ? Би энэ зүйлийг өөрийн нүдээр харж байгаа нь ямар гайхалтай юм бэ?” гэж бодов. Гэнэт би тэнгэрийн улс уруу үнэхээр очиж байгаагаа ухаарсан.
Эзэний тэнгэр элч нарыг би харж байхдаа тэдний юу ярьж байгааг сонсож чадаж байв. Тэдний нэг нь хаалга уруу дотогш орж даруй нэг ном барьсаар гарч ирэв. Номын хавтас нь алтаар хийгдсэн, доторх нь алтаар бичигдсэн байв. Энэ ном миний амьдралын түүх юм шиг санагдав. Учир нь номын хавтсан дээр миний нэр Мари Катерин Бакстер гэж бичээстэй байв.
Тэнгэр элч нарын нүүрэн дээр сайшаасан инээмсэглэл тодров. Тэд номыг онгойлгож, хоорондоо “Тэр хаалгаар орж болох юм байна” гэж ярилцахыг сонсов. Намайг дагуулан явж байсан тэнгэр элч намайг тэнгэрийн улсын сүр жавхлантай хаалгаар хөтлөн оруулав.
Гэнэт хөгжим уянгалан эгшиглэхийг би сонсов. Миний бүх талаас сонсогдож байсан. Миний дээрээс бас сонсогдож байв. Миний бүхий л биеийг нэвтрэн эгшиглэж байв. Эгшиглэнт хөгжим ар араасаа цувран ирж өргөн их газар цуурайтан сонсогдож хүн болгоныг юм болгоныг өөртөө шингээн уянгалан эгшиглэж байгаа мэт санагдаж байв.
Тэнгэрийн улс уруу алхан ороход би дахиад л амьсгаагаа авч чадахгүй алмайрав. Тэнгэрийн улсын сүр жавхлан үгээр илэрхийлэхийн аргагүй. Миний эргэн тойронд урьд өмнө нь амьдралдаа хэзээ ч харж байгаагүй янз бүрийн гоё өнгөтэй цэцэгнүүд байв. Хаа сайгүй ер бусын ногоон өнгөтэй зүлэгнүүд. Цэцэгсийн дэлбээнүүд хөгжмийн аянд ганхан хөдөлж дуулж байх шиг санагдав.
Хөгжим миний биеийг нэвтлэн орж би түүний нэг хэсэг нь мэт санагдаж байв. Энэ бол тэнгэрийн улсын гайхамшгийг илэрхийлэх нэг зүйл бөгөөд бас нэгэн илэрхийлж болох зүйл бол баяр хөөр байв.
Би тэнгэрийн улсын баяр хөөрөөр дүүрэн зарим хүмүүсийг харсан. Тэд бүгд урт дээлтэй байсан. Надад Библийн үгс санагдаж байв.
Би Эзэний дотор ихэд бахдан
Сэтгэл минь миний Бурханд баярлана.
Сүйт залуу өөрийгөө цэцгийн хэлхээгээр чимж,
Сүйт бүсгүй өөрийгөө үнэт чулуугаар гоёдог шиг
Тэр намайг үнэн зөвийн нөмрөгөөр ороож,
Авралын хувцсаар хувцасласан юм.
(Исаиа 61:10)Тэдний царай үгээр илэрхийлэхийн аргагүй баяр хөөр, аз жаргалаар дүрэн байсан. Тэнгэрийн улс бодитой байдаг. Энэ бол хүний санаанаасаа зохиосон зүйл биш. Библид Есүс “Та нар зүрхээ бүү зовоо. Бурханд итгэ, мөн надад итгэ. Миний Эцэгийн гэрт орон байр олон бий. Хэрэв тийм биш байсан бол Би та нарт хэлэх байсан. Би та нарт орон байр бэлдэхээр явна” (Иохан 14:1-2) гэж хэлсэн байдаг.
Тэнгэрийн улс бол бэлтгэгдсэн хүмүүст зориулсан бэлтгэгдсэн газар юм. Бид дахин төрсөн Бурханы хүүхдүүд учраас гайхамшигт төрөлтөөр Христийн дотор шинэ бүтээл болсон учраас бидний Аврагч Эзэнийн бэлдсэн тэр мөнхийн газар бид үүрд амьдрах болно гэдгийг мэдэх нь хичнээн их баяр жаргал вэ?
Тэнгэрийн улс бол төгс газар. Бидний Аврагч бол төгс, бүхнийг чадагч, мөнхийн учраас тэнгэрийн улс бас төгс газар. Тэр биднийг өөртэйгээ хамт мөнхөд байлгах газрыг бэлдэж байгаа учраас бидний мөнх гэр бол төгс юм. Бидний мөнхийн гэр бол юутай ч харьцуулашгүй. Тэнгэрийн улсад нэг ч бохир зүйл, нэг ч хар толбо байхгүй.
“Харин ямар ч бузар юм болон жигшүүрт зүйл үйлддэг хэн ч хэзээ ч тийшээ орохгүй. Харин зөвхөн Хурганы амийн номд нэрс нь бичигдсэн хүмүүс л орох ажгуу” (Илчлэлт 21:27).Тэнгэрийн улсад ямар ч гэм нүгэл, гэмтэн байхгүй. Сатан тэнгэрийн улсаас үүрд таслагдсан.
“Тэнгэрт өөр тэмдэг үзэгдэв. Харагтун, долоон толгойтой, арван эвэртэй агуу том улаан луу байна. Толгойнууд дээр нь долоон титэм байх аж. Түүний сүүл нь тэнгэрийн оддын гуравны нэгийг шавхуурдаж, дэлхий дээр унагав. Луу эмэгтэйг төрмөгц хүүхдийг нь залгихын тулд төрөх гэж буй эмэгтэйн өмнө зогслоо...
Тэнгэрт дайн болов. Михаел болон түүний тэнгэр элч нар луутай тулалдлаа. Луу болон түүний тэнгэр элч нар тулалдаад тэдэнд хүч дутсан бөгөөд тэдэнд тэнгэрт байх газар олдсонгүй. Өнөөх агуу том луу буюу ертөнцийг мэхлэгч диавол ба Сатан гэгддэг эртний могой доош хаягдав. Тэр дэлхий уруу хаягдлаа. Түүний хамт тэнгэр элч нар нь ч доош хаягдав. Би тэнгэрт чанга дуугаар ингэж хэлэхийг сонсов. “Бурханы өмнө ах дүүсийг маань өдөр шөнөгүй буруутгадаг тэднийг буруутгагч доош хаягдсан учраас эдүгээ бидний Бурханы аврал, хүч, хаанчлал ба түүний Христийн эрх мэдэл хүрч ирлээ...
Тиймээс тэнгэр ээ, тэнд нутаглагсад аа баярлан хөөрөгтүн. Газар ба тэнгис золгүй еэ. Яагаад гэвэл диавол үлэмж их уур хилэнтэйгээр та нар уруу бууж ирсэн. Өөрт нь богинохон хугацаа байгааг тэр мэдэж байгаа. Луу дэлхий уруу хаягдсанаа хараад хүү төрүүлсэн өнөөх эмэгтэйг мөшгөлөө” (Илчлэлт 12:3—4, 7—10, 12—13).Тэр хорон могой Сатан, түүний хамтрагчид дахин хэзээ ч тэнгэрийн улсын ариун газар уруу шургалж чадахгүй.
Муу ёрын сүнснүүд тэнгэрийн улс уруу хэзээ ч орж чадахгүй. Бурханы эсрэг тэрсэлж, “эрх мэдэл бүхий байр сууриа сахилгүй харин ч орон байраа орхин одсон” (Иуда 6) тэнгэр элч нар дахин хэзээ ч тэнгэрийн улсад орж чадахгүй.
Бид дэлхий дээр хаана ч амьдарсан ч гэлээ, хичнээн сайхан үнэтэй байшинд амьдарсан ч гэлээ тэр нь төгс төгөлдөр байж чаддаггүй, ямар нэгэн юм дутагддаг. Тэнгэрийн улсыг үүнтэй харьцуулахын бол эсрэгээрээ Бурхан тэнгэрийн улсыг бүтээхдээ ямар ч алдаа гаргаагүй. Тэнгэрийн улсын сүр жавхлан, гоо үзэсгэлэн, гайхамшигт байдал нь хүний төсөөлөл, бодол санаатай харьцуулашгүй. Тэр сайхан газрыг үгээр илэрхийлэхийн аргагүй.
Бурханы Хүүгийн гайхамшигтай гэрэл хас чулуун хана, сувдан хаалга, тоо томшгүй байшингуудын дээр гэрэлтэн цацрах бөгөөд Амийн голын үзэсгэлэнт байдлыг ямар ч уран зурагчин бүтээж чадашгүй.
Аврагдсан сүнснүүдийн гэрТэнгэрийн улс бол байнга орших газар. Ямар ч дайсан Бурханы улсыг эзэлж чадахгүй. Тэнгэрийн улсын байшин хэзээ ч нурахгүй, хэзээ ч муудахгүй, хэзээ ч өнгө төрхөө алдахгүй. Түүний ариун орчныг ямар ч манан, тусгал сүүдэрлэж чадахгүй.
Энэ оршин суух газар бол мөнхийн байнга орших газар юм. Хатти Бюль өөрийн нэгэн дуундаа:
“Майхан, ордон, шилтгээний алийг ч би тоохгүй
Учир нь тэнд миний орон байрыг засч байгаа
Таны алдар бадраг гэж би дуулах болно
Бүх алдар таных, би Хааны охин” гэж дуулсан байдаг.
Энэ гайхамшигтай газар ариун хүмүүс өөрсдийн бүх уй гашуу, өвдөлт, эмгэнэл, тахлаасаа ангижрах болно. Энд уйтгар гуниг, уй гашуу байхгүй. Шаналал зовлон, уйлах дуу байхгүй.
“Тэр тэдний нүднээс нулимс бүрийг арчина. Тэнд цаашид үхэл байхгүй болно. Тэнд цаашид гашуудах, уйлах, өвдөх гэж үгүй болно. Анхны юмс өнгөрөн одлоо” (Илчлэлт 21:4).Тэнгэрийн улсад харсан баяр хөөртэй хүмүүс янз бүрийн насны, янз бүрийн орноос ирсэн хүмүүс байсан. Янз бүрийн үндэстэн ястны хүмүүс гэдэг нь илт байсан. Энэ үед надад Библийн ишлэл санагдаж байсан.
“Тэд шинэ дуу дуулж “Хуйлмал номыг авч лацнуудыг нь эвдэх зохистой нь Та мөн. Учир нь Та нядлуулсан бөгөөд бүх овог, хэл, ард түмэн болон үндэстнүүдээс хүмүүсийг Бурханд Өөрийнхөө ариун цусаар худалдан авч өгсөн билээ” (Илчлэлт 5:9).Бурханы магтаалын ажилТэнд би Христийн гэр бүлийг харсан. Хүн бүр баяр жаргалтай, ямар нэгэн юм хийж, инээж байсан. Хүн бүрийн царай гэрэлтэж байсан.
Тэнгэрийн улсын ариун хүмүүс болгон ямар нэгэн юм хийдэг юм шиг санагдсан. Тэд үргэлж завгүй харагдаж байсан. Тэд Бурханыг магтан өргөмжилж завгүй байсан. Хүн бүрийн ам Бурханыг магтан дуулж байсан. Тэнгэрийн улсад дуу хуур ноёрхож байсан.
Зарим хүмүүсийн боддогоор тэнгэрийн улс бол дуртай зүйлээ хийж цагийг өнгөрүүлдэг, юу хийхээ мэддэггүй залхуучуудын газар биш. Бид тэнд үүлэн дээгүүр хөвж, бүрээ үлээн, Амийн голын усанд хөлөө дүрэхээс илүү зүйлийг хийх болно. Бидний цаг Бурханыг магтах магтаалаар завгүй байх болно. Энэ үйлчлэл нь яг ямар байхыг би мэдэхгүй ч Түүний хүмүүс тэнд үйлчилсэн хэвээр байх болно.
Авралын зар тараагчдад зориулсан алмаазуудТэнгэрийн улсад би гялтганан гялалзах онцгой гэрэлтэй алмаазууд хаа сайгүй байхыг харсан. Зарим нь цементэн блок шиг том том хэмжээтэй байв. Зарим нь дэлхий дээр байгаа авралын зар тараагчдын тэнгэрийн улс дахь байшинг барихад зориулагддаг юм шиг санагдсан. Хэрэв Христчин хүн, хэн нэгнийг Есүс уруу авчирвал тэр итгэлтэй Христчинд тэнгэрийн улс алмаазаар шагнадаг юм шиг санагдсан. Библид хэлэхдээ:
“Шударга зөв хүний үр жимс нь амийн мод юм. Мэргэн хүн сэтгэлийг байлдан дагуулна” (Сургаалт үгс 11:30).“Хэрсүү ухаантай нь тэнгэрийн мандлын гэрэл шиг туяарч олныг зөв шударга байдалд авчрагчид нь од мэт үүрд мөнх гэрэлтэх болно” (Даниел 12:3) гэсэн.
Намайг энэ сүр жавхлант газрын яруу алдар, үзэсгэлэнт байдалд умбаж байхад нэгэн хүч чадалтай, үзэсгэлэнтэй сайхан тэнгэр элч замаар ирж байхыг харав. Тэр гартаа алтан эмжээртэй хуйлмал барьсан байв.
Тэнгэр элч миний урьд өмнө амьдралдаа харж байгаагүй мөнгөн ширээн дээр хуйлмалыг дэлгэв. Энэ зуйван маягийн ширээ гэрэлтэн харагдаж байв. Хуйлмал дээр хүмүүсийн нэрс байв. Нэгэн ариун хүн хуйлмалыг авч уншиж эхлэв.
Нэгэн ариун хүн надад “Есүс бол барилгын эзэн. Тэр алмаазын эзэн хэн болохыг мөн тэд хаашаа явахыг шийддэг” гэж хэлэв. Энэ хуйлмал дээр Есүс уруу хүмүүсийг авчирдаг, ядуусыг хооллож, нүцгэнийг хувцасладаг, Бурханы төлөө агуу зүйлүүдийг хийдэг дэлхий дээрх хүмүүсийн тухай байв.
“Хүний Хүү алдраа дуурсган бүх тэнгэр элч нарынхаа хамт ирж Өөрийн сүр жавхлант сэнтийдээ залрах болно. Тэр бүх үндэстнийг өмнөө цуглуулж, хоньчин хонио ямаанаас тусгаарладаг шиг Тэр тэднийг нэг нэгнээс нь тусгаарлаад хонио Өөрийн баруунтайд, ямааг зүүнтэйд байлгана. Тэгээд Хаан Өөрийн баруунтайд байгсдад хандан хэлэх нь “Миний Эцэгээр ерөөгдөгсөд өө, та нар нааш ир. Ертөнцийн сууриас та нарт бэлтгэсэн хаанчлалыг өвлөн авсугай. Учир нь Намайг өлсөж байхад та нар идэх юм өгсөн. Намайг цангаж байхад уух юм өгсөн. Намайг харь хүн байтал урьж оруулсан, нүцгэн байхад минь Намайг хувцасласан, өвчтэй байхад минь Намайг эргэж байсан, шоронд байхад минь Над уруу ирсэн билээ” гэхэд зөвт хүмүүс Түүнд “Эзэн, бид хэзээ Таныг өлсөж байхыг тань хараад хооллож, цангаж байхыг тань хараад уух юм өгсөн бэ? Хэзээ бид Таныг харь газрынх байсныг тань хараад урьж оруулан, нүцгэн байхыг тань хараад хувцасласан бэ? Хэзээ бид Таныг өвчтэй байхыг тань хараад эргэж, шоронд байхыг тань хараад очсон юм бэ? гэх болно. Тэгэхэд Хаан тэдэнд “Үнэнээр Би та нарт хэлье. Та нар ах дүүсийн маань нэгэнд нь, тэр байтугай хамгийн дордод нь тийнхүү хандсан бол Надад хийсэн хэрэг болно” гэж хэлнэ. Тэгээд Тэр Өөрийн зүүнтэйд байгсдад хандан “Хараагдагсад аа, Надаас зайл. Диавол болоод түүний тэнгэр элч нарт нь бэлтгэсэн мөнх галд ор... Тэд мөнх шийтгэлд, харин зөвт хүмүүс нь мөнх аминд орох юм гэж айлдлаа” (Матай 25:31—41, 46).Хүн болгонд зориулсан өрөөТэнгэр элч надад “Явъя. Бурханы алдрыг харцгаая” гэж урив. Эзэний чиглүүлэлтээр би тэнгэрийн улсад юу харснаа бичиж байна. Бидний итгэл найдвар, хүсэл мөрөөдөл маань Эзэнтэй хамт мөнхөд байх тэр газар байх ёстой гэдгийг ойлгох хэрэгтэй. Тэнгэрийн улс бол мөрөөдөл биелдэг газар юм.
Би тэнгэрийн улсын тухай бодох болгондоо сэтгэл минь хөдөлдөг. Бидний энэ дэлхий дээрх ажил үүрэг, хөдөлмөр маань дуусахад бид энэ дэлхийг орхин тэнгэрийн улс уруу явна. Бурхан бидэнд тэнгэрийн улсыг бэлдсэн бөгөөд Есүс түүнийг хайрладаг хүн болгонд орон байрыг бэлтгэж байна.

Үргэлжлэл бий ...

"Тамын бодит үнэн" 2-р бүлэг

2-р бүлэг

Тамын зүүн хөлАймшигтай муухай үнэр орчныг дүүргэв. Есүс надад “Тамын зүүн хөлөнд маш олон нүх бий. Энэ хоолой тамын бусад хэсэгт биднийг хүргэж өгнө. Гэвч бид эхлээд тамын зүүн хөлөнд хэсэг хугацааг өнгөрөөх болно” гэв.
“Энд харсан зүйлүүд чамтай хамт үргэлж байх болно. Энэ дэлхий тамын бодит байдлыг мэдэх ёстой. Олон нүгэлт хүмүүс тэр ч байтугай миний хүмүүс хүртэл там байдаг гэдэгт итгэдэггүй. Чи энэ үнэнийг хүмүүст хэлэхийн тулд сонгогдсон. Тамын тухай болон чамд үзүүлэх гэж байгаа бүх зүйлүүд үнэн бодит” гэв.
Есүс надад өөрийгөө хурц тод гэрлээр, нарнаас ч хурц тод гэрлээр харуулж байсан, түүний бие гэрлийн дундаас харагдаж байсан. Заримдаа би түүнийг хүний дүрээр заримдаа сүнслэг биеэр харж байсан.
Есүс дахин “Намайг ярихад миний Эцэг ярьдаг. Эцэг бид хоёр нэг. Хамгаас түрүүнд бие биенийгээ уучилж, хайрлахыг бүү март. Намайг одоо дагаарай” гэв.
Биднийг явж байх үед муу сүнснүүд Эзэний оршихуйгаас зайлж байв. “Бурхан минь, Бурхан минь, биднийг одоо юу хүлээж байна вэ?” гэж би Эзэнд чангаар хашгиран хэлэв.
Урьд нь хэлсэнчлэн тамд би бүгдийг мэдэрч байлаа. Тамд буй хэн ч бүгдийг мэдэрч чадна. Миний хувьд би бүх зүйлийг хамгийн сайнаараа мэдэрч байсан. Тал бүрээс айдас, үгээр илэрхийлэхийн аргагүй аюул түгшүүр мэдрэгдэнэ. Алхам бүр минь өмнөхөөсөө илүү аймшигтай байсан.
Бидний дээр хонгилын дээд хэсэгт жижиг цонх шиг хаалга хурдан нээгдэж, хаагдаж байв. Хорон муу биетүүд бидний хажуугаар нисэн өнгөрөхдөө муухай дуугаар хашгиран тамын хаалгаар гаран явж байв. Бид удалгүй хонгилын төгсгөлд ирэв. Би эргэн тойрондоо буй айдас хүйдэс, аюул түгшүүрийг мэдрэхдээ дагжин чичирч байв.
Би Есүсийн хамгаалалтанд үнэхээр их талархаж байв. Намайг тамын нүхэнд хүртэл өөрийн аугаа хүч чадлаараа хамгаалж байсанд би Бурханд талархаж байна. Би түүний хамгаалалтын бамбай дор үргэлж байсан тэр үедээ “Эцэг минь, миний биш таны хүсэл биелэх болтугай” гэж бодсоор байв.
Би өөрийнхөө биеийг харав. Анх удаагаа би өөрийнхөө сүнслэг биеийг харав. Сүнслэг бие минь миний биеийн хэлбэр дүрс байсан. Биднийг одоо юу хүлээж байгаа бол гэж бодсоор байв.
Есүс бид хоёр туннелээс доош буусаар хоёр талдаа тал газар бүхий нэгэн өргөн зам дээр зогсов. Миний нүд гүйцэж үл харж чадах хязгааргүй зайнд галтай нүхнүүд хаа сайгүй харагдаж байв. Эдгээр нүхнүүд диаметрээрээ 1 метр, гүн нь 1 метр орчим аяга шиг хэлбэртэй харагдаж байв. Есүс надад “Тамын зүүн хөлөнд ийм олон нүх бий. Чамд заримыг нь үзүүлье” гэж хэлэв.
Би Есүсийн хажууд зам дээр зогсоод нэгэн нүхийг харав. Нүхний ирмэгийн эргэн тойронд хүхэр байх бөгөөд гал дотор асах нүүрс шиг улаан өнгөтэй харагдаж байв. Нүхэн дотор үхсэнийхээ дараа тамд ирсэн нэгэн сүнс байв. Нүхний дороос гал эхэлж асах бөгөөд дээш явсаар сүнсийг бүхэлд нь шатаана. Дараа нь хэсэг зуур гал намжих боловч эргээд тарчлагдан зовж буй сүнсийг өрдөн шатаана.
Намайг нүхэн доторх сүнсийг харахад түүний араг ясан дотор сүнс нь байхыг харав. “Эзэн минь ээ”, гэж би түүнийг харангуутаа хашгирч, “түүнийг тэндээс авраач дээ” гэж хашгирав. Үнэхээр аймшигтай харагдаж байсан. “Би ч ингээд зовоод байж байх байсан” гэж бодов. Би Эзэнд “амьд сүнс яаж энд ингээд зовоод байж байна вэ” гэж хэлэв.
Гэнэт би нүхнээс хүн хашгирахыг сонсов. Араг ясны дүрстэй тэр сүнснээс “Есүс ээ, намайг өрөвдөөч” гэж хэлэхийг сонсов.
Энэ эмэгтэй хүний хоолой байв. “Эзэн минь ээ” гэж би хашгираад түүн уруу эргэн харж галаас татаж гаргахыг оролдов. Түүнийг харахад миний сэтгэл эмтэрч байлаа.
Араг ясны дүрстэй энэ эмэгтэй бохир саарал шороон дундаас Есүстэй ярьж байв. Шоконд орсон би түүний яриаг сонсов. Түүний биенээс өмхөрөн унах мах галд шарагдан доош унаж байв. Түүний нүдний оронд одоо зөвхөн хоёр харанхуй нүх л үлдсэн байв. Түүний толгойд ямар ч үс байсангүй.
Гал түүний хөлнөөс эхэлж улалзан асах бөгөөд аажмаар дээш явсаар бүх л биеийг хучиж байв. Эмэгтэй үргэлж галд шатаастай байх бөгөөд галын дөл хэсэг намжихад ч гэсэн шатсаар байгаа юм шиг харагдаж байсан. Түүний цөхрөн гашуудсан дуу “Эзэн минь, Эзэн минь, намайг эндээс гаргаач” гэж орилж байв.
Тэр Есүс уруу хүрэхийг оролдсоор байв. Намайг Есүс уруу харахад түүний царай гүн гашуудалд автсан байв. Есүс надад “Миний охин, чи энэ дэлхийд гэм нүглийн үр дүн бол үхэл бөгөөд там гэж үнэхээр байдгийг хэлэхийн тулд энд надтай хамт байгаа” гэв.
Намайг эмэгтэй уруу дахин харахад түүний араг ясан дээгүүр өтнүүд явж байв. Тэдгээр өтнүүд галд шатахгүй байв. Есүс надад “Энэ өтнүүд түүний бие дотор явж байгааг тэр мэдэрч байгаа” гэв.
Гал дэгдэн асч, аймшигтай үзэгдэл дахин давтагдахад “Бурхан минь, түүнийг өрөвдөөч” гэж би хашгирав. Эмэгтэйн дүрс чангаар орилон уйлахдаа чичирч байв. Тэр үүрд алдагдсан байв. Түүнд эндээс гарах ямар ч арга зам байхгүй байлаа. “Есүс, тэр яагаад энд байгаа юм бэ?” гэж би аяархан асуув. Учир нь би айж байв.
Есүс “явъя” гэж хэлэв.
Бидний явж буй зам тойрог хэлбэртэй бөгөөд миний нүд гүйцэж үл харж чадах зайнд эдгээр галтай нүхнүүдийг сүлжин өнгөрсөн байв. Үхсэн боловч амьд буй сүнснүүдийн хашгирах орилоон чарлаан, гаслант дуунууд миний тал бүрээс ирж байв. Тамд хэзээ ч нам гүм байдал байхгүй. Үхсэн хүний үнэр, үхсэн махны үнэр орчин тойронд нэвт шингэсэн байв.
Бид дараагийн нүхэн дээр ирэв. Энэ нүхэн дотор түрүүчийнхтэй адил хэлбэр дүрстэй араг ясны нэгэн дүрс байв. Эрэгтэй хүний хоолой нүхэн дотроос “Эзэн минь ээ, намайг өрөвдөөч” гэж хэлэхийг сонсов. Эдгээр сүнснүүд ярьж эхлэхэд л би тэднийг дуу хоолойгоор нь эрэгтэй, эмэгтэйг нь ялгаж байсан.
Эрэгтэй гашуунаар гашуудан уйлж байв. “Есүс ээ, намайг уучлаач. Намайг эндээс гаргаач. Би энд олон жилийн турш тарчлан зовж байна. Танаас гуй, намайг эндээс гаргаач.” Түүнийг ингэж хэлж байхад түүний араг ясны дүрс чичирч байв. Намайг Есүс уруу харахад тэр уйлж байв.
“Есүс Эзэн минь ээ, миний зовлон одоо хангалттай биш гэж үү? Би энд ирээд 40 жил болж байна” гэв.
Есүс “Зөвт хүн итгэлээр амьдардаг” гэж бичигдсэн байдаг. Басамжлан доромжлогчид болон үл итгэгчид галтай нууранд өөрсдийн шийтгэлээ авах болно. Чи үнэнд итгээгүй. Олон удаа миний хүмүүс чамд үнэнийг харуулахаар очсон боловч чи тэднийг сонсоогүй. Чи тэднийг шоолон инээж сайн мэдээг хүлээн авахаас татгалзсан. Би чиний төлөө загалмай дээр цовдлогдсон боловч чи намайг басамжлан доромжилж өөрийн гэм нүглээс эргэхээс татгалзсан. Миний Эцэг чамд аврагдах олон боломжийг өгсөн. Намайг чи сонссон ч болоосой” гэж хэлэв. Есүс уйлж байв.
Эрэгтэй “Эзэн минь ээ, би мэднээ, би мэднээ. Гэвч би одоо таны өмнө гэмшиж байна” гэж уйлж байв.
“Одоо дэндүү оройтсон. Шүүлт тогтоогдсон” гэж Есүс хэлэв.
Эрэгтэй үргэлжлүүлэн “Эзэн минь, миний зарим хүмүүс энд ирэх гэж байна, тэд таны өмнө гэмшээгүй. Эзэн минь, та намайг тэдэн уруу явуулж тэднийг дэлхий дээр байхад гэмшүүлэхийн тулд намайг явуулаач. Би тэднийг энд ирэхийг хүсэхгүй байна” гэв.
“Тэнд сайн мэдээ тарааж буй номлогчид, багш нар, сүмийн ахлагч нар байгаа. Тэд тэдэнд хэлнэ. Бас миний тухай мэдэх өөр олон арга замууд, орчин үеийн харилцааны системүүд бий. Би тэднийг өөртөө итгүүлж аврахын тулд ажилчдыг илгээсэн. Хэрэв тэд сайн мэдээг сонсоод итгэхгүй юм бол үхлээс дахин амилсан хүний үгэнд яаж үнэмшихэв” гэж Есүс хэлэв.
Үүнийг сонсоод эрэгтэй маш их уурлаж, Есүсийг харааж эхлэв. Түүний амнаас бузар хараалын үгс урсаж эхлэв. Түүний үхсэн бие дээгүүр гал авалцан асч улмаар галд шарагдан доош унаж байгаа аймшигтай үзэгдлийг үргэлжлүүлэн харав. Эрэгтэйн үхсэн бие дотор түүний сүнс байгааг би олж харав. Түүний сүнс бохир саарал шороо шиг харагдаж байсан бөгөөд түүний араг ясан дотор байв.
Би Есүс уруу эргэн харж, “Эзэн минь ээ, ямар аймшигтай юм бэ?” гэж дуу алдав.
Есүс “Там үнэхээр байдаг. Миний шүүлт үнэн. Гэсэн ч би тэдэнд хайртай, охин минь. Энэ бол чамд харуулах гэж буй аймшигтай зүйлсүүдийн дөнгөж эхлэл нь. Цааш чи олон зүйлийг харах болно.”
“Там үнэхээр байдаг бөгөөд эрэгтэй, эмэгтэй бүх хүн миний өмнө гэмших хэрэгтэй гэдгийг чи дэлхийд хэлэх хэрэгтэй. Одоо намайг дагаарай. Бид цааш явах хэрэгтэй” гэв.
Дараагийн нүхэнд 80 орчим насны жижигхэн биетэй настай эмэгтэй байв. Түүний насыг би яаж мэдэж байснаа мэдэхгүй гэхдээ би мэдэж байсан. Түүний арьс галын тасралтгүй дөлөнд биенээсээ салан унаж байсан бөгөөд зөвхөн түүний бохир саарал сүнс түүний араг ясан дотор харагдаж байв. Түүнийг хэрхэн шатаж байгааг би харав. Удалгүй би түүний араг ясан дээгүүр галд шатдаггүй өтнүүд сүлжилдэн явахыг харав.
“Эзэн минь ээ, ямар аймшигтай юм бэ?” гэж би дуу алдав. Би цаашид яаж энэ бүгдийг тэсэхээ мэдэхгүй байв. Энэ бол миний хязгаар, хүч чадлаас даван гарсан дэндүү аймшигтай зүйлс байв. Миний нүд хязгааргүй үргэлжлэх галтай нүхэн доторх олон сүнснүүдийг харж байв.
“Миний охин, чи яагаад энд байгаа учир нь чи тамын тухай үнэнийг мэдэж, дэлхийд хэлэх ёстой. Тэнгэрийн улс бодитой оршин байдаг. Там үнэхээр байдаг. Явцгаая, бид цаашаа явах хэрэгтэй” гэж Есүс хэлэв.
Би эмэгтэй уруу эргэн харав. Тэр гашуунаар уйлж байв. Түүнийг харж байтал тэр хоёр ясархаг гараа урдаа залбирч байгаа мэт хавсрав. Би нулимсаа барьж чадахгүй байв. Миний бие сүнсэн бие байсан боловч би уйлж байв. Тамд буй хүмүүс эдгээр бүх зүйлийг мэдэрдэгийг би мэдсэн.
Есүс миний юу бодож байгааг мэдэж байв. “Тиймээ, миний охин, тэд бүх зүйлийг мэдэрдэг. Хүмүүс энд ирэхдээ дэлхий дээр байсан шигээ бүх зүйлийг санаж, бодож, мэдэрдэг. Тэд өөрсдийн найз нөхөд, гэр бүлийнхнийгээ санадаг, тэдэнд хэдийгээр дэлхий дээр гэмших боломж үргэлж байсан боловч тэд намайг хүлээн авахаас татгалзсан. Тэдний өнгөрсөн бүх дурсамжууд тэдэнтэй хамт байдаг. Тэд оройтохоосоо өмнө сайн мэдээнд итгэж, миний өмнө гэмшсэн байсан ч болоосой.”
Намайг настай эмэгтэй уруу дахин харахад түүний нэг хөл байхгүй байхыг анзаарав. Түүний нэг ташаанд цөмлөөд орчихсон юм шиг хар нүх онгойн харлаж байв. “Есүс ээ, энэ юу вэ?” гэж би асуув.
Тэр “Охин минь, тэр дэлхий дээр байхдаа хорт хавдар тусч маш их өвдөн шаналж байсан. Түүний амийг аврахын тулд хагалгаа хийсэн. Тэр зүрх сэтгэлдээ олон жилийн турш харамсал гашуудлыг тээн явсан. Миний олон хүн түүний төлөө залбирч, намайг эдгээж чадна гэдгийг хэлэхийн тулд түүн дээр очиж байсан. Гэвч тэр “Бурхан надад энэ зүйлийг хийж өгсөн” гэж хэлээд сайн мэдээнд итгэж, миний өмнө гэмшихээс татгалзсан. Нэг удаа тэр намайг таньсан боловч хэсэг хугацааны дараа намайг үзэн ядсан.”
“Тэр Бурхан надад хэрэггүй гэж хэлээд надаар өвчнөө эдгээлгэхээс татгалзсан. Гэсэн ч би түүнд туслахыг хүсч, өвчнөөс нь салгаж, ивээхийг олон удаа оролдсон. Тэр надаас нүүр буруулж, намайг хараасан. Тэр Есүс надад хэрэггүй гэж хэлсэн. Гэсэн ч миний сүнс түүнийг ятгасаар байсан. Тэр надаас нүүрээ буруулсан ч би Сүнсээрээ түүнийг өөр уруугаа ирэхийг ятгасаар байсан. Гэвч тэр намайг сонсоогүй. Дараа нь тэр нас барж, энд ирсэн.”
Настай эмэгтэй Есүс уруу хашгиран “Есүс Эзэн минь ээ, намайг уучлаач дээ. Би дэлхий дээр байхдаа танд гэмшээгүйдээ харамсаж байна. Би дэндүү хожимдохоосоо өмнө гэмших минь ч яав даа. Эзэн минь ээ, намайг эндээс гаргаач. Би таны төлөө амьдрах болно. Би сайн хүн байх болно. Миний зовлон хангалттай биш гэж үү? Яагаад би хожимдож ойлгох ёстой юм бэ? Таны Сүнс намайг ятгаж байхад би юунд гэмшсэнгүй вэ?” гэж гашуудан уйлж байв.
Есүс түүнд “Чамд миний өмнө гэмшиж, надад үйлчлэх боломж үргэлж байсан” гэв. Бид цааш алхахад Есүсийн царай гутрал гунигт автсан байв.
Би настай эмэгтэйн уйлахыг харсны дараа “Одоо, Эзэн минь, бидэнд дараа юу тохиолдох вэ” гэж асуув.
Би тал бүрдээ айдас мэдэрч байв. Гуниг гутрал, өвдөлт шаналал, үхлийн уур амьсгаа хаа сайгүй байв. Есүс бид хоёр харамсал гашуудалтайгаар дараачийн нүхэн дээр ирэв. Түүний хүч чадлаар л би алхаж чадаж байв. Холоос өнөөх настай эмэгтэйн гэмшин, уучлал гуйж буй дуу сонсогдсоор байв. Түүнд тусалж чаддаг ч болоосой гэж би бодов. Гэм нүгэлт хүмүүс минь, Бурханы Сүнс таныг ятгасаар байгаа дээр гэмшигтүн. Бүү хүлээ.
Дараагийн нүхэнд нэгэн эмэгтэй өвдөг дээрээ суун ямар нэгэн юм хайж байв. Түүний араг ясан бие дээр олон нүх онгойн харлаж байв. Түүний биений зарим хэсгүүдэд яс нь ил гарч, галд шатсан хувцас нь салбайн харагдаж байв. Түүний толгой дээр үс байсангүй, түүний нүд, хамар байх ёстой газар хар нүхнүүд харлан харагдаж байв. Түүний өвдөглөн сууж байсан газраас гал шатан асч тэр хүхэрт нүхний хажуугаар самардаж эхлэв. Гал түүний гар уруу асахад түүний биенээс мах тасран унаж байв.
Тэр айшигтайгаар чарлан орилоход бие нь чичирч байв. “Эзэн минь ээ, намайг эндээс гаргаач.” Түүнийг харж байтал тэр нүхний ирмэг дээр гарч ирэн хөл дээрээ зогсов. Түүнийг нүхнээс гарах нь дээ гэж бодож байтал хугарсан юм шиг хоёр том далавчтай нэгэн аварга том муу ёрын сүнс түүн уруу гүйн ирэв. Түүний бие нь бор хар өнгөтэй, аварга том бие нь үсээр хучигдсан байв. Баавгай шиг том биетэй бөгөөд нүд нь дух уруугаа хүнхийн орсон байв. Муу ёрын сүнс түүнийг шүүрэн авч галтай нүх уруу хүчтэй шидэв. Түүнийг нүхэн дотор эргэн унахыг харав. Надад үнэхээр хэцүү байв. Би түүнийг гартаа тэврэн авч Бурханаас эдгээхийг гуйж тэндээс гаргахыг хүсч байлаа.
Есүс миний бодлыг мэдэж, “Миний охин, шүүлт тогтоогдсон. Бурхан түүнд үгээ дамжуулж байсан. Би түүнийг хүүхэд байхад нь дуудаж миний өмнө гэмшин надад үйлчил гэж хэлсэн. Түүнийг 16 настай байхад би түүн дээр ирж, “Би чамд хайртай. Надад амьдралаа өгч, намайг дага. Чиний амьдралд онцгой төлөвлөгөөг бэлдсэн” гэж хэлсэн. Түүнийг би амьдралынх нь турш дуудсан боловч тэр намайг сонсоогүй. Тэр “Би хэзээ нэгэн цагт танд үйлчлэх болно. Одоохондоо би завгүй байна. Завгүй байна. Миний амьдрал хөгжилтэй сайхан байна. Есүс ээ, одоохондоо би танд үйлчилж чадахгүй. Маргааш би үйлчлэх болно” гэж хэлдэг байсан. Харин маргааш хэзээ ч ирээгүй. Тэр хэтэрхий удсан.
Эмэгтэй Есүс уруу орилж, “Миний сүнс үнэхээр их тарчлан зовж байна. Надад хаашаа ч гарах зам алга. Эзэн минь ээ, би танаас илүү дэлхийг хүсч байснаа мэдэж байна. Би эд баялаг, нэр хүнд, хувь заяаг хүсч байсан. Би хүссэнээ авсан. Би хүссэнээ худалдан авдаг байсан. Би өөрөө өөртөө эзэн нь байсан. Би цаг үеийнхээ хамгийн хөөрхөн, хамгийн гоё хувцастай эмэгтэй байсан. Би баян, нэр төртэй, хувь заяатай хүн болсон. Гэвч би үхэхдээ тэдгээрийг өөртэйгээ хамт авч явж чадаагүй. Эзэн минь ээ, тамд үнэхээр аймшигтай байна.
Надад энд өдөр шөнийн алинд ч амралт алга. Би үргэлж өвдөн шаналж байна. Эзэн минь ээ, надад туслаач” гэж хашгирав.
Эмэгтэй Есүс уруу харсан хэвээр “Эзэн минь ээ, би таныг сонссон ч болоосой. Би үүрд харамсаж байна. Би өөрийгөө бэлэн болохоор танд үйлчилнэ гэж бодож байсан. Та үргэлж миний төлөө байх болно гэж бодож байсан. Гэвч миний буруу байжээ. Би цаг үеийнхээ хамгийн сайхан эмэгтэй байсан. Бурхан намайг дуудаж байгааг би мэдэж байсан. Бурхан хайраараа намайг үргэлж өөр уруугаа татдаг байсан. Тэгээд би бусдыг ашигладаг байсан шигээ Бурханыг ч бас ашиглая гэж бодсон. Тэр миний төлөө үргэлж байх болно гэж бодсон. Тиймээ, би Бурханыг ашигласан. Тэр намайг өөртөө үйлчлүүлэхийн тулд өөр уруугаа үргэлж татдаг байсан. Гэвч би тэр үед надад Бурхан хэрэггүй гэж бодож байсан. Миний буруу байжээ. Би Сатанд ашиглуулах болсон. Би Сатанд улам их үйлчлэх болсон. Эцэст нь би түүнийг Бурханаас илүү хайрлах болсон. Би гэм нүгэлтэйгээ байх дуртай болж, Бурханаас эргэсэн.”
“Сатанаас би хүч чадлыг авахын тулд Сатан миний гоо сайхан, мөнгө, бодол санааг ашигласан. Гэсэн ч Бурхан намайг өөр уруугаа дуудсаар байсан. Гэвч би маргааш, дараа хэзээ нэгэн цагт гэж бодож байсан. Тэгээд би жолоочтойгоо машиндаа суугаад явж байтал байшин мөргөж, би үхсэн. Эзэн минь ээ, намайг эндээс гаргаач.” Тэр ийнхүү ярьж байхдаа хоёр гараараа Есүст хүрэхийг оролдож байв. Гал түүний биеийн эргэн тойронд шатсаар байв.
Есүс “Шүүлт тогтоогдсон” гэв.
Бид дараагийн нүх уруу явахад Есүсийн хацар дээгүүр нулимс урсч байв. Би тамын аймшгийг хараад дотроо уйлж байв. Эзэн минь ээ, тарчлал зовлон үнэхээр байдаг юм байна. Үхсэний дараа хүний сүнс энд ирэхэд ямар ч найдвар, ямар ч амьдрал, ямар ч хайр байхгүй. Там дэндүү бодит байдаг юм байна” гэж би уйлж байв. Энд хаашаа ч гарах арга зам байхгүй. Тэр эмэгтэй энд үүрд шатах болно.
“Цаг хурдан өнгөрч байна. Бид энд маргааш дахин ирнэ” гэж Есүс хэлэв.
Найз минь, хэрэв чи гэм нүгэлтэйгээ хэвээр амьдарсаар байгаа бол гэмшээрэй. Хэрэв чи Сүнсээр дахин төрсөн боловч Бурханаас эргэсэн бол яг одоо түүнд гэмшиж, түүн уруу эргэгтүн. Сайн амьдралаар амьдарч, үнэний төлөө зогс. Дэндүү хожимдохоосоо өмнө сэрээрэй. Тэгвэл чи тэнгэрийн улсад Бурхантай үүрд хамт байх болно.
Есүс “Там өөрийн хэлбэр дүрстэй, дэлхийн төвд нуруугаараа харан хэвтэж байдаг. Там бол хүний биеийн хэлбэр дүрстэй, маш том, тарчлан зовоох олон өрөөнүүдтэй” гэж надад хэлэв.
“Там бодитой оршин байдгийг дэлхийн хүмүүст хэл. Сая сая сүнснүүд энд байдаг, өдөр бүр энд олон сүнснүүд ирдэг. Агуу Их Шүүлтийн өдөр үхэл, там хоёр галтай мөнхийн нуурт үүрд хаягдах болно. Тэр хоёр дахь үхэл байх болно” гэв.
Үргэлжлэлийг доорх линкээр орж үзнэ үү.

http://jesus-faith.blogspot.com/2009/07/blog-post_826.html